世界之最

唔知幾時開始, 身邊好多人都好似自我中心咗。

無論我講咩, 佢哋都聽唔入耳, 我講咗半句(冇誇張, 係半句!), 就會有人話:「我仲點點點啦......」「你都唔算嘞, 我......」。

佢哋係工作最忙o既、最悶o既、最慘o既... 都可以係最靚o既、最型o既... 咩都好, 總之就一定要係「最...」o既, 即係英文前面要加"the", 後面要加"-est"嗰隻。好歹都要排個第一, 先至叫做對得住自己~

遇得多呢啲情況, 我會選擇收口, 冇必要再多講嘞... 好無癮... 你唔聽, 又知我咩事??? 邊個話俾你知我返工好得閒冇嘢做? 邊個話我老闆對我好好? 邊個話俾你知我家宅平安, 事事如意???

一係佢哋都唔當我係朋友, 冇人想回應我o既訴求, 雖然我只係想要一個listener。

因為呢啲不快, 我更加要學叻啲, 唔可以令身邊o既人有hard feeling。