心有靈犀一點通

4/12 sunday
我星期日不嬲都會瞓到日上三竿、係唔出街都唔願起身嗰隻~ 呢一日我發咗個夢, 我夢先一個由中五開始到而家都冇見過o既好朋友---阿鼠。

阿鼠會考之後就過咗美國讀書, 跟住我哋就失散到而家喇... 都唔知點解無端端會夢見佢~ 之後我當冇事發生過繼續瞓~ (其實正確嚟講係冇醒過至啱~ haha~)

過咗一陣, 我細佬聽咗個電話, 話有個女仔搵我~ 以下係我同嗰個女仔o既對話:
K: 喂。
F: 喂, 你估吓我係邊個?
K: (未瞓醒) 你可唔可以講多兩句嘢嚟聽吓呀?
F: 你好多年... 有五年冇見過我喇...
K: ...... 阿鼠???!!
F: 醒目喎, 一估就估到~
K: (彈起身高八度咁講) 呀~~~ 阿鼠, 我啱啱夢見你呀!!!!!!

天南地北咁傾傾傾, 傾咗成個鐘呀~

我問佢做咩會無端端打俾我, 佢話睇緊紀念冊, 見到我寫俾佢既嘢所以就打俾我嘞~ 咁咪即係你睇緊我寫俾你o既紀念冊嗰陣我就夢見你囉~ 勁呀~ 我覺得係真係心有靈犀, 邊會有啲咁橋o既事先得ga~~~~~~ ^o^

阿鼠同以前一樣, 劈頭第一句就叫我report我呢幾年o既love affairs, haha~ 好搞笑呀~~~

真係好開心好開心~~~ 希望出年summer你會返嚟玩啦~

shit... 收咗線之後我先發現... 我冇阿鼠contact, 我諗又要同佢失散多一陣子喇............