無題

前兩日打咗篇ok長架...
但係禁錯掣所以就成篇冇晒...
內容大致上係咁：
1. 睇咗小飛俠，可能係英文版，所以都ok~
2. 去咗環球嘉年華，時隔一年再次挑戰top buzz~ 今次一啲都唔驚~ 仲覺得好好玩添~ 好叻呀~ 不過因為發咗癲咁嗌，所以喉嚨勁痛~
3. 睇到你個journal，覺得你實在太任性喇...

*****

過多兩日就要返學啦~
返咗學就冇得日日都玩、日日都瞓到日上三竿lu...

恭喜發財~~~

今日已經係大年初三~ 恭喜發財~~~
咁遲先同大家拜年，係因為我日日都瞓足十四個鐘~ 唔得閒上網~~~

新o既一年，我希望大家都開開心心~ 精神爽利~ 心想事成~~~

*****

年卅晚，我同阿欣joseph同阿華去咗維園行年宵~
就係唔知點解，明知係去迫餐懵，都要去...

行完年宵，就同佢哋去咗食糖水~ 送埋阿欣上車後冇耐大家都返屋企lu~

希望阿欣同阿華兩個單身o既，俾啲桃花拂一拂之後今年都可以行個桃花運啦~

本來約咗班兄弟，但佢哋遲到...
真係失望，次次都係咁...
我真係次次出黎都準時架喎... (雖然次次預咗你哋會遲... >_<)

*****

年初一大清早... 我同屋企人返咗鄉下...
(扭咗一大輪計，始終都係要返... 係咪任性咗啲呢?)

即日來回，三點鐘又返到羅湖... 冇意思...

*****

年初二去咗伯娘屋企拜年，好多人...
最開心就係同我姨甥女玩~~~
二歲幾，識行識走識同你傾計，勁得意~~~
我唔俾佢叫我大姨姨，一定要叫姐姐~ 呵呵呵~~

簡直係母愛泛濫o既一日... ^^"

無題

澳門之旅(16-17/1/2004) 既「遊記」終於都寫好，有興趣可以去睇~ ^^

*****

三分鐘後

有一天 他終於會遇到我 這剎那即將發生 給我找到

喜歡的不會喜歡我 我愛你但你不愛
單戀相戀到失戀太累了嗎 我愛你但你愛他
誰是你 愛戀的場地 買不到戲飛 等愛的滋味
有一天 他終於會遇到我
這剎那即將發生 三分鐘後那可出錯
轉個彎 兜一圈 走到街角
看到了街燈再轉 終會找到

水一般素白一張臉 一息間泛了粉紅
一分鐘心跳加速 你望到嗎 這剎那像個啞巴
來伴我 愛戀那場地 買得到戲飛 相愛的滋味
有一天 他終於會遇到我
這剎那終於發生 三分鐘後那可出錯
轉個彎 兜一圈 走到街角
看到了街燈再轉 終會找到

有一天 他終於會遇到我
這剎那即將發生 三分鐘後那可出錯
就算兜兜轉 終會碰到你你你
最好不過的都發生了 我找到你
你要給我很多天 天天也講我愛你
就這麼簡單 可以的話
喜歡的總會喜歡我 我愛你是最可愛
相戀一天到一生 也是你嗎
你愛上也是我吧

鐘意紫色~

前晚同細妹同埋細佬去咗行街，辦年貨同埋買新衫新鞋~~~
呢個行街o既組合都係第一次，都幾得意~ 我成日都話，要趁細佬仲細、仲肯同我出街o既時候我啲帶佢出街玩吓，有個美好回憶都好嘛~ (haha~ 因為我細個嗰陣都冇人帶我去街玩~ @_@)
同細佬買衫都ok麻煩，佢鐘意嗰啲我又唔想佢著，我想買俾佢嗰啲佢又唔鐘意喎，佢真係大個仔喇~ haha~~~ 買兩件衫都咁耐... 唉~~~
我今季原來真係咗好多紫色o既嘢~ 連對air force 1個tick都係紫色架~ 愈睇愈鐘意囉~~~~~~

*****

擒日出咗尖咀行街，順便睇埋個激光~ 都唔好睇o既~~~
之後同joseph阿華jacky去咗睇"鬼馬狂想曲"...
超謬謬，真係得啖笑囉...
不過我最鐘意睇twins同埋吳鎮宇~~~

完場步出戲院，我呢頭笑阿華冇帶鎖匙冇屋企返，嗰頭發現自己都冇帶...... 冇屋企返...... 唉......
就係咁... 我就同大家去咗唱k喇...

the last samurai

星期六晚我同joseph去咗睇湯告魯斯o既最後武士。

好好睇，真係好好睇呀~~~

雖然我對武士道精神係咪真係可以令人搵到真正o既內心平靜存疑，但係呢種
die-hard既信仰真係有啲恐怖...

由傳統至現代o既衝突、矛盾，又點止咁少?

澳門之旅第二天

第二朝食咗酒店o既自助早餐，唔係太好食，不過算啦~

check-out咗之後就即刻去賽車博物館同埋紅酒博物館~~~
全個trip影得最多相o既就係喺賽車博物館，我都唔知點解~ (不過因為攰攰哋，所以全部相都唔識笑...)
過咗隔離紅酒博物館，成人有得試酒，但係我只係呷咗一小淡~ (都唔好飲~~~)

博物館對面係「盛世蓮花」，同金紫荊差唔多，不過係蓮花~ 所以我都扮吓啲自由行專誠走過去好娘咁影咗一幅相~ ^^"

出發去氹仔~~~
個巴士站喺博物館對面，我哋撞到博物館o既其中一個保安，佢竟然好nice咁問我哋：「你哋去邊呀?」仲教埋我哋搭28A~ 真係好搞笑~ 可能因為我出出入入博物館都三四次啦~ (大致上係因為要唱葡幣、又要借廁所... 來來回回咗好幾次 ^^")

到咗氹仔，我哋叫佢做「車厘哥夫鎮」，真係好多好多間車厘哥夫，賣紐結糖~ 我不嬲都好鐘意食~ (如果我冇記錯，小媚都鐘意食~) 買咗兩隻味，但始終都係比較愛最傳統o既花生~~~

去氹仔，緊係去搵大利來o既豬扒飽啦，搵咗好一段時間，三點正差一分鐘到咗，個老闆一見我哋就話：「出緊嚟，等多一分鐘!」睇真啲真係全場都淨係去食豬扒飽架咋...
正宗豬扒飽，唔錯呀~ 我開頭估佢最多都係件豬扒好食，個飽會差啲，但點知佢個飽都好得~ 唔覺得滯~ 聽聞話係用炭烘架喎~
嗰度啲牛筋面都好好食~ 冇咩梘水味~ 唔錯~
(早餐之後三點先第一餐，食咩都好味啦...... 哈~)

澳門之旅，氹仔都算係最後一站lu~ 大家有冇發現我冇去到旅遊塔呢?
唉~~~ 我都唔知我點解冇去到呀~~~~~~ 不過唔去成旅遊塔，就反而睇多咗紅街市、賽狗場~ 黑沙灣都差唔多到埋~~~ 睇多咗啲真正地道澳門人住o既地方囉~ (但係我講唔出有咩唔同，唔好問我~)

唔... 焉知非福呢~ 因為呢兩日都好大霧，我諗就算上到個塔都應該睇唔到啲咩~ haha~ 亦都正因為咁，我諗我好快就會去多一次澳門架啦~



THE END

澳門之旅第一天

咁大個女第一次去旅行，今次我同joseph去咗澳門玩~ 過二人世界~

冇旅行比今次更加多巧合~ 所以由一出發開始我就覺得，我今次一定係整定要去澳門架啦~
搭地鐵嗰陣睇都市日報體育版，你估我見到邊個~?? 係費高呀~ 即刻精神一掁啦~ 係咪同葡萄牙有緣先~~~ 同葡萄牙有緣係咪即係同澳門有緣先~~~? (咪理我發噏風啦~ 開心嘛~~~)
上船之前買咗本Monday，今次有好幾版介紹澳門，係咪啱~~~

可能因為太期待今次澳門之旅，所以之前一晚好似唔係好瞓得著~~~

第二朝一早起身搭咗八點半嗰班船去澳門，到埗之後搭專車去到酒店(我哋住帝濠酒店~)，十點都唔夠，諗住check-in先，但係佢冇房，要等到十二點。就係咁，我哋就跟住本旅遊書去咗酒店附近一間叫做鼎泰豐o既台灣美食到食早餐~

牛肉麵同雲吞麵都幾好食，但係蟹粉小籠飽就冇書入面介紹o既咁好囉~ 價錢相宜~ (早餐都咁豐富o既~~?)

早餐之後喺酒店附近流連一番，差唔多夠鐘就返酒店喇~ 帝濠係一間三星酒店，係Polly介紹我去住o既，都ok架~ 放低行李hea咗一陣之後我哋就出發去議事亭前地，呢度行得最耐，因為最多嘢睇同最多嘢行~ 手信都係喺呢度買架~

議事亭前地附近都有好多為香港人熟悉o既店舖~ 不過我同joseph行行下就到咗大三巴~ 大三巴隔離有一個天主教藝術博物館，同大三巴遺址起埋一齊o既，入面有啲油畫、雕塑，好快就行完~ (正正後面有坐哪吒廟，相映成趣~)

出返去之後，沿住啲鐵樓梯行上去就到咗澳門博物館同埋大炮台嘞~ 澳門博物館有中國、葡萄牙、澳門o既發展歷程睇，學生半價都只係八蚊，值得一去架~

下一站我哋想去消防博物館，好蝦人搵... 啲路又唔好行，不過，後尾誤打誤撞都俾我哋搵到~ 一入去就見到大大架消防車，有個櫃展覽咗好多唔同國家唔同年代o既頭盔，我比較鐘意美國嗰頂~ 型啲~ 另外，我同咗一個公仔影咗張相，身形龐大，著住套防生化衫，成個太空人咁~ (我同joseph都叫個公仔做jacky~)

去完消防博物館之後行咗條長命斜返大三巴附近，因為未食晏好肚餓，所以諗住去搵糖水鋪，睇住書入面幅地圖，行黎行去都搵唔到... 咁經過鉅記手信，就順便走入去買蛋卷同牛乾豬乾~ 而且仲不停咁試食~ 新鮮夾好o既蛋卷真係超級正，仲有好多肉乾，諗唔到o既白鴿乾都有囉...

告別大三巴，我哋行返落議事亭~ 想行吓街~ 點知行行下唔知點解到咗嚤囉街... 好橋，因為睇地圖根本就搵唔到~ (hahaha~) 嗰度啲鋪頭都係賣舊嘢為主，有舊玩具又有舊書攤，不過呢... 冇咩特別~

離開嚤囉街，又唔知自己行咗去邊...... 見到間麥當娜餅店(唔係景點嚟架!)當堂慘叫咗一聲，因為唔經唔覺，我哋竟然行咗去消防博物館附近... 唉... 又一次要行條長命斜返去...... poor me~

不過，又一次誤打誤撞，到咗另一個景點---白鴿巢公園。好攰，所以冇入到去~

一路再行，經過一個街口見到一間joseph全程都喺度搵o既嘢---機鋪。澳門o既機鋪格局同機種其實同香港o既差唔多，唯一唔同o既係... 喺入面o既全部都係小朋友... 我睇住個靚妹玩fing手機，仲勁過我... 呆咗=_="

又一路行...... 再一次返到大三巴...(#@$%#)xy%>!!!!!!)
不過今次有意外收穫，就係我竟然見到kary啦~~~~~~ 喺澳門都見到同學仔，世界真細小嘞~~~~~~ 好surprise~~~~~~ 大家影咗幾張相之後就分道揚鑣~ 我想搵多一次間糖水鋪，但點知都係mission failed...

終於又返返去議事亭行街，買咗胚芽奶茶，八蚊大大杯，抵呀~! 又行莎莎卓悅(無聊嘛~)同埋葡文書局。間書局淨係賣葡文書，我又見到費高嘞~ 呵呵呵~

晚飯@九如坊，係一間正宗葡國菜~ 餐單如下：
1. 三文魚梳夫厘---好香三文魚~ 入口即溶~ 真係好鐘意~
2. 椰菜炒馬介優---joseph家姐話一定試馬介優，所以試咗~ 不過我覺得好似鹹咗啲啲~
3. 焗鴨飯---趁熱食~ 好香~ 入口嗰下真係「好好味呀!」咁叫咗出嚟囉~~~
overall呢餐我俾四粒星~ 因為貴咗少少~

晚飯之後，搭巴士返酒店睇花樣中年大結局，個結局勁白痴!

睇完戲，去咗葡京賭場，以為佢離酒店好遠，所以搭的士，點知上到車，個司機勁唔順氣，亂咁fing架車，我深知不妙，點知真係轉個彎就到咗...... 玩老虎機，冇贏錢呀~ 但總算見識過啦~

咁就一日啦~ 返酒店覺覺豬~ 第二日再玩過~

寫作需時，待續...

過大海~~~

我考完試(好多日)喇~

聽日會過大海，週休兩日~

唔知會點呢? ^^

*****

你快樂(所以我快樂)

你眉頭開了 所以我笑了
你眼睛紅了 我的天灰了

呵天曉得 既然說 你快樂 於是我快樂
玫瑰都開了 我還想怎麼呢
求之不得 求不得 天造地設一樣的難得
喜怒和哀樂 有我來重蹈你覆轍

你頭髮濕了 所以我熱了
你覺得累了 所以我睡了

不問為什麼 心安理得

日月如梳

果晚同小媚同阿欣傾電話，「三個女人一個墟」真係唔係浪得虛名~

好耐之前就同大家講：「碼頭要拆喇... 不如去多次影吓相啦...」不過就硬係冇咗件事... 而家成個海旁都唔同晒樣，小媚話碼頭嗰度啲水淺到可以喺啲石上面行，我諗嗰個亭都應該俾人鏟埋lu...

大河道間M記大大大翻新，變得好cafe喎...

兩個大家中一中二就開始"磨爛席"o既地方都面目全非... 好唏噓...
好可惜... 冇喺呢兩個地方影張大合照。

小時候，又點會估到短短五年會變咁多嘢丫......

*****

擒日晏晝去咗我小學老師屋企，傾校友會o既嘢~
見到幾個校友，雖然都係第一次見，但係就好快好熟絡~ 畢竟都有共同話題---小學生活~~~
比較搞笑o既係其中一個係我個妹o既小學同班同學，佢一見到我就話：「我記得你~ 你係孫翠敏丫嘛~」^^" 記得佢小時候肥嘟嘟八八厭厭，而家真係年青有為look喎~

玩咗一個下晝想當年~ 亦都希望下次gathering我會得閒去~ ^_^

無題

考試嘛... 所以成個星期冇寫囉~

我覺得會考得唔好，咩都好似冇咩把握咁喎...
唉... 由得佢啦，反正都唔重要...

我都覺得我好唔夠時間抖，好似一啲喘息o既時間都冇...
但係唔打緊啦~ 考到星期二之嘛~~~

*****

因為陶傑o既關係，我好鐘意睇香港熱鬧~
頭先啱啱睇完一集，成班男人喺度潑婦罵街!(陶傑除外)
真係痴線架!
希望下次可以有啲高質素一啲o既講者......

*****

不嬲都唔鐘意女子十二樂坊，唔好理點解，總之就係唔鐘意!!!!!!
喺街邊聽到係會急步走架! 之前有朋友話會送佢隻碟俾我做聖誕禮物(話咋喎!)，我都嬲到想喊~

anyway，頭先睇咗慧沁send過嚟o既"阿mike著作"------草彅剛十二樂坊~
笑到我扒喺度囉... 真係好鬼可愛~~~

首歌都幾cheerful丫~ 草彅個造型又頂癮~ 真係... ^_^"

哼... 女子十二樂坊，你哋聽住，有朝一日我如果對你哋改觀，都係因為草彅剛咋!!!

話時話，如果我而家拎住個琵琶... 唔知我仲彈得出啲咩呢?

*****

下個星期應該會去澳門~~~
真係未出發先興奮嘞~~~

無題

今日考o既英文，我諗係今個final exam既第一個滑鐵盧...
啲reading唔係難，但係好煩。
而且我仲係好holiday mood，收拾唔到心情做份卷囉...

睇黎黎緊個半星期我都要懸樑刺股架喇~~~
(因為我假期好好好懶...... 又因為我日日都要補習囉...)

*****

魔戒真係一套扣人心弦o既電影~

但係... 啲幽靈就咁就打死晒啲半獸人...
會唔會有少少屈機呢...??!

haha~~~

無題

happy new year~